ავტორიზაცია
"ტენ ჰაგმა გუნდიდან გამიშვა, ახლა კი ჩემს პოზიციაზე ევროპაში საუკეთესო ვარ"
ერიკ ტენ ჰაგი მანჩესტერ იუნაიტედის მთავარ მწვრთნელად 2022 წელს დაინიშნა. თავიდან, მასზე დიდ იმედებს ამყარებდნენ, თუმცა, უკვე ფაქტია, რომ ნიდერლანდელმა დაკისრებულ მოვალეობას თავი ვერ გაართვა.
ყველაფერთან ერთად, ტენ ჰაგმა ფეხბურთელების გაშვებასთან დაკავშირებით საკამათო გადაწყვეტილებები მიიღო. მან ისეთი ფეხბურთელები გაასხვისა, როგორებიც კრიშტიანუ რონალდუ და ჯეიდონ სანჩო არიან. თუმცა, ახლა ჩანს, რომ ყველაზე დიდი შეცდომა დავიდ დე ხეას გაშვება იყო.
ესპანელი მოთამაშე მანჩესტერ იუნაიტედს 2011 წელს შეუერთდა და პრემიერ ლიგის ისტორიაში ერთ-ერთ საუკეთესო მეკარედ იქცა. რთულ სეზონებში ის გუნდს მხსნელად ევლინებოდა, განსაკუთრებით სერ ალექს ფერგიუსონის წასვლის შემდეგ. არსენალთან 2017 წელს გამართულ მატჩს, რომელშიც დავიდმა 14 სეივი განახორციელა, ჯერ კიდევ იხსენებენ, როგორც მეკარის ყველა დროის ერთ-ერთ საუკეთესო პერფორმანსს.
2022/23 წლების სეზონში პრემიერ ლიგის ოქროს ხელთათმანის მოგების მიუხედავად, ტენ ჰაგმა დე ხეა გაუშვა. 1-წლიანი პაუზის შემდეგ, ესპანელი ფეხბურთელი ფიორენტინაში გადავიდა და ფორმა სწრაფად აღიდგინა. Sofascore-ის მიხედვით, სტატისტიკურად, დე ხეა ევროპაში საუკეთესო მეკარეა, რაც მიუთითებს, რომ ნიდერლანდელ სპეციალისტს ფეხბურთელების გაწვრთნასთან და მათგან საუკეთესოს მიღებასთან დაკავშირებით პრობლემები ჰქონდა.
თანაც, აღსანიშნავია, რომ ტენ ჰაგმა მანჩესტერში თავისთვის კარგად ნაცნობი ანდრე ონანა მიიყვანა, რომელზეც ვერ ვიტყვით, რომ იუნაიტედში კარიერის საუკეთესო წლებს ატარებს. "წითელმა ეშმაკებმა" კამერუნელის სანაცვლოდ €50 მილიონი გადაიხადეს.
რაც შეეხება დე ხეას: ესპანელმა სერია A-ში 8 მატჩი ჩაატარა, კარი მშრალად 4-ჯერ შეინახა და 2 პენალტი მოიგერია (ერთ მატჩში, მილანის წინააღმდეგ).
ტენ ჰაგი რამდენიმე დღის წინ დაკავებული თანამდებობიდან გაუშვეს, მის ნაცვლად კი რუბენ ამორიმი დანიშნეს.
