ტერ შტეგენი, შესაძლოა, ელ კლასიკოში დაბრუნდეს

ეს არ ნიშნავს, რომ გერმანელი მეკარე ელ კლასიკოში ითამაშებს, მაგრამ განაცხადში იქნება. მარკი სრული დატვირთვით ვარჯიშობს და, გავრცელებული ცნობებით, მალე სამედიცინო პერსონალისგან თამაშის ნებართვას მიიღებს.

ტერ შტეგენმა მძიმე ტრავმა 2024 წლის სექტემბერში მიიღო და მას შემდეგ არ უთამაშია. ამის გამო კატალონიურმა კლუბმა შესნი დაიმატა, რომელიც შესანიშნავ ფორმაშია. პოლონელმა ლურჯ-ბროწეულისფერი მაისურით ჩატარებულ 24 მატჩში კარი მშრალად 12-ჯერ შეინახა და მხოლოდ 1 წაგება აქვს.

საინტერესოა, რა გადაწყვეტილებას მიიღებს ჰანსი ფლიკი, როცა ორივე გოლკიპერი თავის განკარგულებაში იქნება. უნდა ითქვას ისიც, რომ ჩემპიონთა ლიგაზე ტერ შტეგენს თამაში მხოლოდ იმ შემთხვევაში შეეძლება, თუ განაცხადიდან შესნის ამოიღებენ.

თავდაპირველად, ვარაუდობდნენ, რომ ტერ შტეგენი სეზონის დარჩენილ ნაწილს გამოტოვებდა, მაგრამ მისი რეაბილიტაცია გაცილებით სწრაფად წარიმართა.