უმტიტიმ ახალ კლუბში სამედიცინო შემოწმება ვერ გაიარა და ტრანსფერი ჩაიშალა
"ბარსელონას" ცენტრალური მცველის, სამუელ უმტიტის "რენში" ტრანსფერი ჩაიშალა, იტყობინება ცნობილი ესპანური გამოცემა Diario Sport-ი.
არსებული ინფორმაციით, ლიგა 1-ის კლუბის მთავარ მწვრთნელს, ბრუნო ჟენეზიოს, რომელიც ფრანგ უკანახაზელთან ერთად "ლიონში" მუშაობდა, 28 წლის ფეხბურთელის თავისი გუნდის რიგებში ხილვა უნდოდა, მაგრამ ამ უკანასკნელმა სამედიცინო შემოწმება ვერ გაიარა, რის გამოც ტრანსფერი ჩაიშალა და ამან "ბარსას" ხელმძღვანელობა ძალიან იმედგაცრუებული დატოვა.
ახლა კი, უმტიტისთან განშორების მიზნით, კატალონიურ გრანდს ერთადერთი ვარიანტი დარჩა - კონტრაქტის გაწყვეტა და კომპენსაციის სახით გარკვეული თანხის გადახდა.
მოგეხსენებათ, სამუელი "ბარსელონას" 2018 წლის ივლისში "ლიონიდან" 25 მილიონი ევროს სანაცვლოდ შეუერთდა.
გასულ სეზონში ტრავმებისგან დატანჯული უმტიტი "ლურჯ-ბროწეულისფერთა" მაისურით მოედანზე მხოლოდ ერთხელ მოგვევლინა.
