VIDEO: კლასიკა კოპა ამერიკას ფინალში! არგენტინამ კოლუმბიას პენალტებში მოუგო

კოპა ამერიკას მეორე ნახევარფინალში არგენტინამ პენალტების სერიაში კოლუმბია დაამარცხა და ფინალში გავიდა.

მატჩის ძირითადი დრო ფრედ, 1:1 დასრულდა. უკვე მე-7 წუთზე ანგარიში ლაუტარო მარტინესმა, ლეო მესის საგოლე გადაცემით გაიტანა, რომლისთვისაც ეს ამ ტურნირის მე-6 მატჩში უკვე მე-9 საგოლე ქმედება იყო.

ტაბლოზე ანგარიში თითქმის ერთ საათს შენარჩუნდა, შემდეგ კი კარდონას პასით ლუის დიასმა წონასწორობა აღადგინა და შეხვედრაში მეტი გოლი აღარ გასულა.

ამრიგად, გუნდებს გამარჯვებულის გარკვევა პენალტების სერიაში მოუწიათ, სადაც უკეთესი არგენტინის ნაკრები აღმოჩნდა. 

კოლუმბიის ნაკრების რიგებში პენალტი დევინსონ სანჩესმა, იერი მინამ და ედვინ კანდონამ გააცუდეს, არგენტინაში კი გოლი მხოლოდ როდრიგო დე პაულმა ვერ გაიტანა.

ამრიგად, არგენტინა კოპა ამერიკას ფინალში გავიდა, სადაც ბრაზილიის ნაკრებს დაუპირისპირდება. შეხვედრა 11 ივლისს, 04:00 საათზე დაიწყება.