ვილი სანიოლის პრესკონფერენცია სომხეთთან მატჩის წინ

წინა მატჩებზე: "წლის ბოლოს ბევრი ფეხბურთელი გადაღლილი იყო. ევროპის ჩემპიონატმაც თავისი წვლილი შეიტანა. ბევრს ფსიქოლოგიური დაღლილობა ეტყობოდა, მაგრამ, ვფიქრობ, მომავალ მატჩებს უკეთეს ფორმაში შეხვდებიან."

დანაკლისზე: "კაშია და კვარაცხელია მნიშვნელოვანი ფეხბურთელები არიან, თუმცა გვყავს სხვებიც და მათი ჩანაცვლება შეგვიძლია. მაგალითად: საბა გოგლიჩიძე - მის დებიუტს აქამდეც ველოდით."

სომხეთთან მატჩებზე: "საკმაოდ მნიშვნელოვანი დერბი გველის. ყველანი ძალიან მოტივირებულნი ვართ და გვსურს, წელი წარმატებით დავიწყოთ. C დივიზიონში ასპარეზობას ნამდვილად არ ვიმსახურებთ და ჩვენი მიზანია, B დივიზიონში ადგილი შევინარჩუნოთ."

მამარდაშვილზე: "გიორგისა და ვალენსიას მძიმე სეზონი აქვთ. მამარდა ერთ-ერთი საუკეთესო ფეხბურთელია. მან ბოლო 2 წელიწადში ძალიან ბევრი მატჩი ჩაატარა და დასვენება სჭირდებოდა. მამარდაშვილი მაღალი დონის მეკარეა და ეჭვი არ მეპარება, რომ მომავალში ფორმაში აღიდგენს."

კვარაცხელიაზე: "ბედნიერი ვარ, რომ ხვიჩა პარი სენ-ჟერმენში გადავიდა. ჩანს, რომ ის მოედანზე სიამოვნებას იღებს. კვარა ბევრს მუშაობს, პროდუქტიულია შეტევაშიც და დაცვაშიც - ველი, რომ ნაკრებშიც ასე გაირჯება."

ლუკა ლაცაბიძეზე: "ლუკა ახალგაზრდა და ნიჭიერია. თუ ის შრომას გააგრძელებს, ნაკრების მომავალი იქნება. ამ შეკრებაზე მას უკეთ დავაკვირდები და ვნახავ, გამოვიყენებ თუ არა შემოდგომის მატჩებისთვის. ლაცაბიძის გამოძახების მიზეზი მომავალზე ფიქრიცაა. ადრე თუ გვიან, თაობათა ცვლის დრო აუცილებლად დადგება და ამაზე მუშაობა უკვე უნდა დავიწყოთ."

კვარაცხელიას შეცვლაზე: "მას ვერავინ შეცვლის, რადგან უნიკალური ფეხბურთელია. ბევრი კარგი მოთამაშე გვყავს, მაგრამ ხვიჩა შეუცვლელია. მის არყოფნაში ტაქტიკური ცვლილებების განხორციელება მოგვიწევს, რაც სხვებს შესაძლებლობას მისცემს, თავი წარმოაჩინონ."

საქართველო ერთა ლიგის პლეიოფში, B დივიზიონში დარჩენისთვის სომხეთთან ორმატჩიან დუელში იბრძოლებს. პირველი დაპირისპირება 20 მარტს, ერევანში შედგება, 3 დღის შემდეგ კი, განმეორებით მატჩს თბილისი უმასპინძლებს.