ჟოზეს რომა ზედიზედ მეორე ევროტურნირის მოგებისთვის იბრძოლებს - ევროპა ლიგის ფინალისტების ვინაობა ცნობილია

ევროპა ლიგაზე ორივე ფინალისტის ვინაობა გაირკვა.

პარალელურად მიმდინარე შეხვედრებში ერთმანეთს „ლევერკუზენი“ – „რომა“ და „სევილია“ – „იუვენტუსი“ ეთამაშებოდნენ.

„ლევერკუზენი“ 0:0 „რომა“ (0:1)

პირველ მატჩში ჟოზე მოურინიოს „რომამ“ ერთბურთიანი უპირატესობა მოიპოვა, როცა 1:0 მოიგო და ეს რომაელებისთვის ფინალში გასასვლელად საკმარისი აღმოჩნდა.

უდიდესი უპირატესობის მიუხედავად, „ლევერკუზენმა“ გოლის გატანა ვერ მოახერხა და ტურნირს ნახევარფინალური ეტაპიდან გამოეთიშა, „რომა“ კი შარშან კონფერენც ლიგის მოგების შემდეგ, ზედიზედ მეორედ გავიდა ევროპა ლიგის ფინალში და გამარჯვებისთვის იბრძოლებს.

„სევილია“ 2:1 „იუვენტუსი“ (3:2)

მეორე მატჩში კი ანდალუსიაში მაქს ალეგრის „იუვე“ ჩავიდა, რომელიც პირველ მატჩი „სევილიასთან“ მარცხს ბოლო წუთებზე გადაურჩა.

65-ე წუთზე დუშან ვლაჰოვიჩმა „იუვე“ დააწინაურა, თუმცა ტურინელების უპირატესობამ დიდხანს ვერ გასტანა - 71-ე წუთზე სუსომ ანგარიში გაათანაბრა და საქმე დამატებით დრომდე მივიდა.

95-ე წუთზე ერიკ ლამელამ გადამწყვეტი გოლის გატანა მოახერხა, რომელმაც „სევილია“ „თავისი“ ტურნირის, ევროპა ლიგის ფინალში კიდევ ერთხელ გაიყვანა და ანდალუსიური გუნდი მისი მეშვიდედ მოგებისთვის იბრძოლებს.

გადამწყვეტი შეხვედრა 31 მაისს უნგრეთში, „პუშკაშ არენაზე“ „სევილიასა“ და „რომას“ შორის გაიმართება.