უიშვიათესი მოვლენა! უკანასკნელად როდის ვერ გაუტანა მესიმ მთელ სეზონში ვერც რეალს და ვერც ატლეტიკოს?

ლა ლიგის 35-ე ტურის მატჩი „ბარსელონა“ „ატლეტიკო“ „კამპ ნოუზე“ ფრედ, 0:0 დასრულდა.

ეს სეზონი ლა ლიგაში ცოტა არ იყოს უცნაური აღმოჩნდა. „ბარსელონამ“ თავის მთავარ კონკურენტებთან, მადრიდის „რეალსა“ და „ატლეტიკოსთან“ 4 მატჩში 12 შესაძლოდან მხოლოდ 1 ქულა აიღო.

გარდა ამისა, ლეო მესიმ მთელ სეზონში, ანუ ოთხივე მატჩში ვერცერთხელ ვერ შეძლო „რეალის“ ან/და „ატლეტიკოს“ კარის აღება.

უკანასკნელად მსგავსი რამ შორეულ 2005/06-სეზონში მოხდა, როცა მესიმ ლა ლიგის სრულ სეზონში ვერცერთ მადრიდულ გრანდს ვერ გაუტანა.

მას შემდეგ, ლეო სეზონში როგორც მინიმუმ ერთ გოლს მაინც სულ უტანდა ხოლმე „რეალს“ ან/და „ატლეტიკოს“, ხშირად კი ერთზე გაცილებით მეტსაც.

დღეს ლა ლიგაში გადამწყვეტი მატჩის დღეა - „რეალი“ შინ „სევილიას“ მასპინძლობს და გამარჯვების შემთხვევაში, ცხრილში გალიდერდება და ჩემპიონობის ბედი მის ხელში გადავა.

უგოლო ფრე კამპ ნოუზე - ლა ლიგის ჩემპიონობის ბედი მადრიდის რეალის ხელში გადავიდა