რონალდუს სასურველი კლუბები უკვე შერჩეული ჰყავს — Cadena SER
"იუვენტუსის" თავდამსხმელმა, კრიშტიანუ რონალდუმ ზაფხულში შეიძლება ტურინული გრანდი დატოვოს, იტყობინება Cadena SER.
36 წლის პორტუგალიელმა ჯერ კიდევ სეზონის დასრულებამდე უთხრა ახლობლებს, რომ თუ "ბებერი ქალბატონი" ჩემპიონთა ლიგის საგზურის გარეშე დარჩებოდა, გუნდიდან წავიდოდა.
საბოლოო ჯამში, "ბიანკონერიმ" ევროპის მთავარი საკლუბო ტურნირზე თამაშის უფლება მოიპოვა, თუმცა კლუბის ხელმძღვანელობამ მთავარი მწვრთნელი, ანდრეა პირლო გაათავისუფლა და მასიმილიანო ალეგრი დანიშნა, რომელსაც პორტუგალიელი ფორვარდი არ სჭირდება, რის შესახებაც აქამდე არაერთხელ დაიწერა.
თავად ფეხბურთელიც არ არის სამუშაო ადგილის შეცვლის წინააღმდეგი და მისთვის პრიორიტეტული ვარიანტი "მანჩესტერ იუნაიტედში" დაბრუნებაა. გარდა "ეშმაკუნებისა", განიხილება "რეალის" ვარიანტიც.
კლუბებისთვის ერთადერთი დაბრკოლება რონალდუს მაღალი ხელფასია, რომელიც წლიურად დაახლოებით 30 მილიონ ევროს შეადგენს.
