"ბოდიშით, მაგრამ არ მგონია, რომ ეს არჩევანია", - ლაუდრუპმა უეფას გადაწყვეტილება გააკრიტიკა

დანიის ნაკრების ყოფილმა ნახევარმცველმა, მიქაელ ლაუდრუპმა, უეფას მიერ მიღებული გადაწყვეტილება გააკრიტიკა.

შეგახსენებთ, რომ კრისტიან ერიქსენის მოედანზე უგონოდ დაცემის გამო, ევრო 2020-ს მატჩი დანია - ფინეთი დაახლოებით ერთი საათით შეწყდა, ხოლო როდესაც გაირკვა, რომ ერიქსენი თავს უკეთ გრძნობს, მატჩის იმ დღესვე გაგრძელების გადაწყვეტილება იქნა მიღებული.

„როცა მსგავსი რამ ხდება, ფეხბურთელები ემოციების ზღვას განიცდიან და მნიშვნელოვანი გადაწყვეტილებების მიღება არ შეუძლიათ. ვიღაცას უნდა ეთქვა: „დღეს ამაზე შევჩერდეთ.“ მაგრამ, ფეხბურთელებს არჩევნის ილუზიას უქმნიან. ჩაამთავრეთ მატჩი დღესვე ან გამოდით სათამაშოდ ხვალ 12-ზე. ბოდიშით, მაგრამ მე არ მგონია, რომ ეს ნორმალური არჩევანია.

თამაშის გაგრძელების გადაწყვეტილებას, ასეთი ემოციური მოვლენის შემდეგ, არასწორად მივიჩნევ. უეფას უბრალოდ უნდა ეთქვა: „რა თქმა უნდა, ამ საღამოს თამაშს ვეღარ გავაგრძელებთ. შემდეგ კი ვნახოთ, რა ვარიანტები გვაქვს.“  არამგონია, ეს სწორი იყოს, მაგრამ ეს მხოლოდ ჩემი აზრია.

ვამაყობ დანიის ნაკრების ფეხბურთელებით, რომლებიც ასეთი შოკის შემდეგ მოედანზე გავიდნენ და კარგადაც ითამაშეს.“ - ციტირებს ლაუდრუპის სიტყვებს BT Sport.

შეგახსენებთ, რომ გაგრძელებული მატჩი ფინეთთან დანიამ 0:1 დათმო.
 

ტოტენჰემის ყოფილმა ექიმმა ერიქსენის ინციდენტის სავარაუდო მიზეზი დაასახელა