"მისი ყურებით მეტოქეებიც კი სიამოვნებას იღებენ", - სკალონიმ მესის ყველა დროის საუკეთესო ფეხბურთელი უწოდა
არგენტინის ნაკრების მთავარმა მწვრთნელმა, ლიონელ სკალონიმ, ეკვადორთან კოპა ამერიკის მეოთხედფინალში მოპოვებული გამარჯვების (3:0) შემდეგ, ლეო მესი შეაქო.
აღნიშნულ შეხვედრაში, მესიმ ორი საგოლე გადაცემა და ერთი გოლი მიითვალა. ჯამურად, ამ კოპა ამერიკაზე ლეოს 5 მატჩში 4 გოლი და 4 საგოლე გადაცემა დაუგროვდა.
„არ ვიცი, დაიღლება თუ არა ლეო ოდესმე ყოველდღიური ქებისგან. როგორც ფეხბურთის მოყვარულს, იმედი მაქვს, რომ ის ითამაშებს იქამდე, სანამ ამის შესაძლებლობა ექნება.
მეტოქეებიც კი სიამოვნებას იღებენ მისი თამაშით. მესი - ყველა დროის საუკეთესო ფეხბურთელია. მასთან შედარება ყველას ძალიან გაუჭირდება. ნეიმარს შეუძლია მსგავსი ფეხბურთელი გახდეს, მაგრამ ის, რასაც ლეო აკეთებს, ჩვენ სამუდამოდ დაგვამახსოვრდება.“ - ციტირებს სკალონის სიტყვებს Mundo Deportivo.
კოპა ამერიკას ½-ფინალში არგენტინის ნაკრების მეტოქე კოლუმბია იქნება, რომელმაც ურუგვაის პენალტების სერიაში მოუგო.
