ეს იქნება ძალიან დიდი ტრანსფერი - სლუცკიმ კვარაცხელიას წასვლა დაანონსა
ყაზანის რუბინის მთავარმა მწვრთნელმა ლეონიდ სლუცკიმ გუნდიდან შვედი მცველის, კარლ სტარფელტის სელტიკში წასვლის შემდეგ კიდევ ერთი ფეხბურთელის გაყიდვა დაანონსა.
ყაზანელთა მთავარმა მწვრთნელმა არ დააკონკრეტა, თუ ვისზე იყო საუბარი, თუმცა ნათელია, რომ იგი ხვიჩა კვარაცხელიაზე საუბრობდა.
"სტარფელტის წასვლა? ფეხბურთში ეს ბუნებრივი მომენტია, რადგან როცა საინტერესო წინადადებას იღებ, იძულებული ხარ დათანხმდე.
არაა გამორიცხული, ამ ზაფხულს კიდევ ერთმა ფეხბურთელმა დაგვტოვოს და როცა ეს გაოფიციალურდება, იქნება ძალიან დიდი ტრანსფერი," - განაცხადა ლეონიდ სლუცკიმ.
ხვიჩა კვარაცხელიასადმი ევროპული გუნდების ინტერესებზე ბოლო კვირები აქტიურად იწერებოდა, თუმცა რამდენიმე დღეა სიტუაცია მიწყნარდა. არაერთ პრესაში დაიწერა, რომ მისი შეძენით ლიდს იუნაიტედი, მილანი და სევილია იყვნენ დაინტერესებულნი.
