მოულოდნელი არჩევანი და უარი ესპანეთზე — ცნობილი გახდა, თუ რომელ ნაკრებში ითამაშებს მორიბა
"ბარსელონას" ნახევარმცველმა, ილაიშ მორიბამ გადაწყვეტილება მიიღო იმის შესახებ, თუ რომელი ქვეყნის ნაკრების ღირსებას დაიცავს.
ასე და ამგვარად, როგორც ცნობილი ესპანური გამოცემა Cadena SER იტყობინება, 18 წლის ფეხბურთელი გვინეის ეროვნულ გუნდში ითამაშებს და არა ესპანეთის.
მორიბას, რომელიც გვინეის დედაქალაქ კონაკრიშია დაბადებული, ესპანეთის 17 და 18-წლამდელთა ნაკრებებში საერთო ჯამში 9 მატჩი აქვს ჩატარებული, მაგრამ ეროვნულ ნაკრებში თამაში არ ისურვა.
სავარაუდოდ, "ბარსას" ფეხბურთელს 2022 წლის მსოფლიო ჩემპიონატის საკვალიფიკაციო ეტაპზე გვინეა-ბისაუსთან 1 სექტემბერს გასამართი მატჩისთვის გამოიძახებენ.
მოგეხსენებათ, მორიბამ აქამდე "ბლაუგრანასთან" ახალი კონტრაქტის გაფორმება იუარა, რის გამოც კლუბმა გერმანიაში წინასასეზონო შეკრებაზე არ წაიყვანა. ახალგაზრდა ფეხბურთელი კლუბს ფინანსურ საკითხზე ვერ უთანხმდება, რის გამოც წასვლა უნდა.
