რამდენად რეალურია კავანის ბარსელონაში გადასვლა და როგორია თავად ფეხბურთელის პოზიცია?
ახალი ამბავი არ არის, რომ "ბარსელონა" ზაფხულის სატრანსფერო ფანჯრის უკანასკნელ დღეს თავდამსხმელს ეძებს. კატალონიელთა მთავარი კანდიდატი იყო ჟოაო ფელიქსი, მაგრამ მადრიდის "ატლეტიკოდან" უარი მოვიდა.
ამის შემდეგ, რამდენიმე წყარომ დაწერა ედინსონ კავანის მიმართ ინტერესის შესახებ და ინსაიდერ ხერარდ რომერომ ისიც აღნიშნა, რომ "ბლაუგრანაში" გადასვლის წინააღმდეგი არც თავად მოთამაშეა.
ურუგვაელი ფორვარდი "მანჩესტერ იუნაიტედიდან" წასვლაზე დაფიქრდა მას შემდეგ, რაც კლუბში კრიშტიანუ რონალდუ დაბრუნდა. ერთი სიტყვით, "ეშმაკუნებიდან" წასვლა რეალური ჩანდა.
ფაბრიციო რომანომ ცოტა ხნის წინ დაადასტურა, რომ "მანჩესტერი" არ გაუშვებს თავის შემტევს არც "ლურჯ-ბროწეულისფრებში" და არც სხვა რომელიმე კლუბში.
სამხრეთ ამერიკელი ბომბარდირი განიხილება "იუნაიტედის" პროექტის მნიშვნელოვან ნაწილად და მის მდგომარეობას არც პორტუგალიელი შემსრულებლის ქამბექი შეცვლის.
