ცნობილი გახდა რონალდუს იუვენტუსიდან მანჩესტერ იუნაიტედში ტრანსფერის დეტალები
ცნობილი გახდა თავდამსხმელ კრიშტიანუ რონალდუს "იუვენტუსიდან" "მანჩესტერ იუნაიტედში" ტრანსფერის დეტალები, იტყობინება გავლენიანი ჟურნალისტი, ფაბრიციო რომანო.
ინგლისური კლუბი 36 წლის პორტუგალიელში 15 მილიონ ევროს გადაიხდის, თუმცა ხუთ ნაწილად - 3 მილიონი ყოველწლიურად 2026 წლამდე.
აგრეთვე, შეთანხმებაში გათვალისწინებულია საერთო ჯამში 8 მილიონი ევროს ოდენობის ბონუსები. სავარაუდოდ, რონალდუ 5 მილიონის მოთხოვნებს შეასრულებს, აი დანარჩენ 3 მილიონთან დაკავშირებული პირობების დაკმაყოფილება საეჭვოა.
"მანჩესტერ იუნაიტედმა" კრიშტიანუს დაბრუნება 27 აგვისტოს დაადასტურა. იგი "ეშმაკუნების" ღირსებას 2003 წლიდან 2009 წლამდეც იცავდა. მანიკუნიანელთა რიგებში მან პრემიერ ლიგა 3-ჯერ მოიგო და ჩემპიონთა ლიგის ტიტულს დაეუფლა.
2018 წლიდან ფორვარდი ტურინის "იუვენტუსში" ირიცხებოდა, სადაც ყველა ტურნირზე ერთად 133 მატჩში მიიღო მონაწილეობა და 101 გოლი გაიტანა.