ვინისიუსი რეალის ერთ-ერთი ყველაზე დაბალანაზღაურებადი ფეხბურთელია — რამდენს გამოიმუშავებს ბრაზილიელი?
"რეალის" თავდამსხმელს, ვინისიუს ჟუნიორს, რომელმაც სეზონი ბრწყინვალედ დაიწყო, მადრიდულ გრანდში საკმაოდ დაბალი ხელფასი აქვს.
როგორც ავტორიტეტული გამოცემა Goal.com იტყობინება, ბრაზილიელი "სამეფო კლუბის" 5 ყველაზე დაბალანაზღაურებად ფეხბურთელს შორის არის. ამჟამად 21 წლის შემტევი წლიურად 3,2 მილიონ ევროს გამოიმუშავებს, ბონუსების გათვალისწინებით ეს თანხა შესაძლოა 4 მილიონამდე გაიზარდოს.
"რეალში" დაახლოებით ამდენივეს გამოიმუშავებენ დანი სებალიოსი, ხესუს ვალიეხო და ანდრეი ლუნინი.
აღინიშნება, რომ ვინისიუსი "რეალში" ერთ-ერთი პირველი ფეხბურთელი იყო, რომელიც კორონავირუსის პანდემიით გამოწვეული კრიზისის გამო ანაზღაურების შემცირებას დათანხმდა.
"ბლანკოსი" ახალგაზრდა სამხრეთამერიკელთან ახალ კონტრაქტზე მოლაპარაკებებს ჯერ არ აწარმოებს. თუმცა, მადრიდული კლუბის აზრით, ფეხბურთელმა ხელფასის მომატება დაიმსახურა.
ამ დროისთვის "რეალი" მოლაპარაკებებისთვის მზად არის. კლუბს სურს ბრაზილიელის გამოსასყიდი თანხა გაზარდოს, რომელიც ამჟამად 500 მილიონ ევროს შეადგენს. სავარაუდოდ, ახალი ხელშეკრულების განხილვისას არანაირი დაბრკოლება არ იქნება, რადგან ვინისიუსი ესპანეთის ჩემპიონატის ვარსკვლავობაზე ოცნებობს.
მიმდინარე სეზონში ბრაზილიელმა თავდამსხმელმა ლა ლიგის 6 მატჩში მიიღო მონაწილეობა, 5 გოლი გაიტანა და 2 შედეგიანი გადაცემაც ჩაიწერა საკუთარ აქტივში.
