"ძალიან უცნაურია, როცა შენი პრეზიდენტი ამას ამბობს, წაკითხვის შემდეგ უბრალოდ შევძრწი", - მბაპე
„პსჟ-ს“ და საფრანგეთის ნაკრების ფორვარდმა, კილიან მბაპემ, ფრანგულ პრესასთან გულწრფელად ისაუბრა.
გასულ ზაფხულს, მბაპეს გადაბირებას მადრიდის „რეალი“ ცდილობდა და ფეხბურთელს „პსჟ-დან“ წასვლა თავადაც სურდა. თუმცა, პარიზულმა კლუბმა მადრიდელთა ყველა მცდელობა დააიგნორა და კილიანი თავისთან დატოვა. მიუხედავად იმისა, რომ მომავალ ზაფხულს მას კონტრაქტი ეწურება.
„ძალიან უცნაურია, როცა ისმენ, რომ შენი გუნდის პრეზიდენტი ასეთ რაღაცას ამბობს: „მბაპე უფასოდ არასდროს არ წავა.“ ამის წაკითხვის შემდეგ, შევძრწი, დავდუმდი.
რთულ მდგომარეობაში ვიყავი, თითქოს საკუთარ თავს ვკითხე: „აბა, რა მოხდება?“
2021 წლის 6 ივნისს მიცემულ ინტერვიუში, „პსჟ-ს“ პრეზიდენტმა ნასერ ალ-ხელაიფიმ განაცხადა, რომ კილიანი პარიზელია და ის მას არც არასდროს გაყიდის და არც უფასოდ გაუშვებს.
მიუხედავად ალ-ხელაიფის სიტყვებისა, ყველაფერი საბოლოოდ მაინც მბაპეს ხელში იქნება - თუ ის იანვრამდე „პსჟ-სთან“ ახალ კონტრაქტს არ გააფორმებს, ნებისმიერ გუნდთან მოლაპარაკებების წარმოება დამოუკიდებლად შეეძლება და პირობითად „რეალს“ მომავალ ზაფხულს უფასოდ შეუერთდება.
