ლაპორტა იანვარში კოუტინიოს გაშვებას გეგმავს — ბრაზილიელი ლივერპულში დაბრუნდება?
"ბარსელონას" ნახევარმცველმა, ფილიპე კოუტინიომ ზამთრის სატრანსფერო ფანჯარაზე შესაძლოა კატალონიური კლუბი დატოვოს.
როგორც El Chiringuito TV იტყობინება, "ლურჯ-ბროწეულისფერთა" პრეზიდენტს, ჟოან ლაპორტას უნდა, რომ ბრაზილიელი იანვარში "ბარსადან" წავიდეს.
29 წლის სამხრეთამერიკელის დაბრუნებით "ლივერპულია" დაინტერესებული, ამტკიცებს Okdiario-ს ჟურნალისტი, ედუარდო ინდა პროგრამა El Chiringuito de Jugones-თან საუბრისას.
შეგახსენებთ, კოუტინიო "ბარსელონაში" სწორედ "ლივერპულიდან" 2018 წლის იანვარში 160 მილიონი ევროს სანაცვლოდ გადავიდა.
მიმდინარე სეზონში ფილიპემ ესპანეთის ჩემპიონატის 4 მატჩში მიიღო მონაწილეობა და თავი შედეგიანობით არ გამოუჩენია.