კატეგორიული უარი - ზიდანმა მანჩესტერის მწვრთნელობა ორი მიზეზის გამო იუარა
როგორც ჩანს, ლეგენდარული ფრანგი მწვრთნელი „მანჩესტერ იუნაიტედში“ მისვლას არ აპირებს.
ესპანური გამოცემა Tiempo de Juego-ს ინფორმაციით, „მანჩესტერ იუნაიტედი“, რომელმაც დღეს ოლე გუნარ სოლსკიაერის გაშვება ოფიციალურად დაადასტურა, ზინედინ ზიდანს დაუკავშირდა და მთავარ მწვრთნელად დანიშვნის სანაცვლოდ კარგ ხელფასსაც დაპირდა, თუმცა ფრანგისგან უარი მიიღო.
თუ ზემოთხსენებულ გამოცემას დავუჯერებთ, ამას ორი მიზეზი აქვს: ზიდანს არ სურს „იუნაიტედში“ მუშაობა, რადგან ინგლისური ენა არ იცის და ეს რთულ ბარიერად ესახება, მეორე მიზეზი კი უფრო ოჯახურია: მის მეუღლეს, ვერონიკას მანჩესტერში ცხოვრება არ ხიბლავს და ამიტომ, ზიზუმ ნისლიან ალბიონზე გადაბარგების ვარიანტი გამორიცხა.
„მან.იუნაიტედის“ გარდა, ზიდანით დაინტერესებულია „პარი სენ ჟერმენიც“, რომლის ხელმძღვანელობაც ფიქრობს, რომ ზიზუ არის ერთადერთი მწვრთნელი, რომელსაც შეუძლია კილიან მბაპე გუნდში დარჩენაზე დაიყოლიოს.
ამ ყველაფრიდან გამომდინარე, არ არის გამორიცხული, რომ უახლოეს თვეებში „პსჟ-ს“ დამრიგებელი მაურისიო პოჩეტინო „იუნაიტედში“ დაინიშნოს, პარიზში კი ზიდანი მივიდეს. თუმცა, ეს ჯერჯერობით მხოლოდ თეორიაა.
