პოგბა ბარსელონაში არ გადავა — ორი მთავარი მიზეზი, რის გამოც ხავიმ ტრანსფერზე უარი თქვა
დიდი ალბათობით, "მანჩესტერ იუნაიტედის" ცენტრალური ნახევარმცველი, პოლ პოგბა "ბარსელონაში" არ გადავა, წერს ცნობილი ესპანური გამოცემა Diario Sport-ი.
მიუხედავად იმისა, რომ ფრანგის აგენტმა, მინო რაიოლამ კატალონიელთა პრეზიდენტ ჟოან ლაპორტასთან თავისი კლიენტის პოტენციური ტრანსფერი განიხილა, გარიგებას რამდენიმე გარემოება აფერხებს.
პირველ რიგში, პოგბას ხელფასთან და რაიოლას საკომისიოსთან დაკავშირებული ხარჯები "ბარსასთვის" ზედმეტად დიდია.
მეორეც, "ბლაუგრანას" მთავარი მწვრთნელი, ხავი "ეშმაკუნების" ნახევარმცველის გადაბირებით დაინტერესებული არ არის, რადგან ფიქრობს, რომ გუნდს სხვა პოზიციების გაძლიერება უფრო სჭირდება.
მოგეხსენებათ, პოგბა "მანჩესტერ იუნაიტედის" ღირსებას 2016 წლიდან იცავს და მოქმედი კონტრაქტის ვადა კლუბთან მომავალ ზაფხულს ეწურება.
მიმდინარე სეზონში 28 წლის სუპერვარსკვლავმა მანიკუნიანელთა მაისურით ყველა ტურნირზე ერთად 13 მატჩი ჩაატარა და 7 შედეგიანი გადაცემა გააკეთა, ამჟამად იგი ტრავმირებულია და აღდგენით პროცესებს გადის.
