უსმან დემბელე მსურველების ნაკლებობას არ უჩივის - ფრანგს უამრავ კლუბს უკავშირებენ
ერთბაშად რამდენიმე ევროპული კლუბი ინტერესდება „ბარსელონას“ ფრანგი შემტევის, უსმან დემბელეს გადაბირებით.
როგორც იცით, დემბელეს „ბარსელონასთან“ ახალ კონტრაქტზე მოლაპარაკებები მაღალი ფინანსური მოთხოვნების გამო ჩაეშალა და დიდი ალბათობით, ის გუნდს ზაფხულში უფასოდ დატოვებს.
Mundo Deportivo-ს ინფორმაციით, ფეხბურთელის აგენტმა მუსა სისოკომ „პსჟ-სთან“ წამოიწყო მოლაპარაკებები.
გარდა ამისა, დემბელეთი ინტერესდება მიუნხენის „ბაიერნიც“, რომელიც ასევე მაღალი ფინანსური მოთხოვნების გამო კინგსლი კომანს ვერ უთანხმდება ახალ კონტრაქტზე. თუ მოლაპარაკებებმა შედეგი არ გამოიღო, მიუნხენური გრანდი ყურადღებას სწორედ უსმანზე გადაიტანს.
ასევე, დემბელეს არ ივიწყებს ანტონიო კონტეც, რომელსაც მისი ხილვა „ტოტენჰემში“ სურს. ფეხბურთელს უკავშირებენ ასევე „ლივერპულსაც“, რომელიც ბოლო პერიოდში მის მიმართ გაცივდა. ასევე „მან სიტის“, „ჩელსის“ და „მან იუნაიტედს“.
„ბარსელონა“ ჯერ კიდევ არ ფიქრობს, რომ დემბელესთან შეთანხმება შეუძლებელია, თუმცა გაყინული მოლაპარაკებების გამო, ხელმძღვანელობას მოთმინება ეწურება და კლუბი ფიქრობს, რომ უსმანს ახალ დამსაქმებელთან მალული კონტრაქტი უკვე გაფორმებულიც აქვს.
