მიზეზი, რის გამოც შესაძლოა მესიმ არგენტინის ნაკრების მომდევნო ორი მატჩი გამოტოვოს
არგენტინის ნაკრების თავდამსხმელი, ლიონელ მესი შესაძლოა მომდევნო ორი მატჩისთვის ეროვნულ გუნდში არ გამოიძახონ.
ცნობისთვის, 2022 წლის მსოფლიო ჩემპიონატის საკვალიფიკაციო ეტაპის ეგიდით, "ალბისელესტე" 27 იანვარს ჩილეს დაუპირისპირდება, ხოლო 1 თებერვალს კოლუმბიას.
არგენტინის ნაკრების მთავარმა მწვრთნელმა, ლიონელ სკალონიმ "პსჟ"-ს 34 წლის სუპერვარსკვლავს რამდენიმე დღის წინ გადატანილი კორონავირუსის გამო ზემოთნახსენები შეხვედრების გამოტოვება შესთავაზა, წერს Tyc Sports-ი.
გავრცელებული ინფორმაციით, მესის პასუხი ჯერ არ გაუცია და რამდენიმე დღე ითხოვა დასაფიქრებლად.
ცოტა ხნის წინ, ცნობილი გახდა, რომ ლეომ "პსჟ"-ს რიგებში ვარჯიში განაახლა, მაგრამ გუნდისგან განცალკევებით ვარჯიშობს.
მოგეხსენებათ, არგენტინის ნაკრებმა 2022 წლის მუნდიალის საგზური ჯერ კიდევ ნოემბერში გაინაღდა.