"დინამო თბილისს“ Betlive აღარ დაასპონსორებს, მიზეზი ახალი რეგულაციებია
საფეხბურთო კლუბ „დინამო თბილისის“ სპონსორი კომპანია Betlive აღარ იქნება. ამის შესახებ „დინამო თბილისის“ აღმასრულებელმა დირექტორმა ზაზა დოლიძემ BM.GE ს განუცხადა.
„ახალი სეზონისთვის, ახალი პირობებით, შეთანხმებული კონტრაქტი შეჩერდა; მიზეზი რეგულაციებია, რომელიც აზარტული თამაშების სექტორს ეხება“, - განაცხადა ზაზა დოლიძემ.
მისი თქმით, Betlive-ის სპონსორობის გარეშე დარჩენა კლუბისთვის მნიშვნელოვანი ფინანსური ზიანია.
სასპონსორო პაკეტის დაკარგვით, "დინამოს“ ბიუჯეტს 15% დააკლდება“, - ამბობს „დინამო თბილისის“ აღმასრულებელი დირექტორი.
ზაზა დოლიძის თქმითვე, არამარტო მათი კლუბისთვის, აზარტული თამაშების სექტორი, სხვა ბევრი კლუბისთვისაც მნიშვნელოვანი დაფინანსების წყარო იყო და მათი ჩანაცვლება სხვა პარტნიორებით რთული იქნება.
ინფორმაციისთვის: აზარტული თამაშების კომპანიებისთვის დაწესებული შეზღუდვების ნაწილი უკვე ძალაშია. 2022 წლიდან ამ ბიზნესში ჩართულ სუბიექტებს გადასახადები გაეზარდათ და მათი დასაბეგრი ბაზა 65-70%-ით არის მომატებული. სხვა რეგულაციები, რომლებიც მათ შორის რეკლამის აკრძალვას ითვალისწინებს და ასევე კრძალავს მილიონამდე ადამიანისთვის აზარტულ თამაშებში ჩართულობას, პირველი მარტიდან ამოქმედდება.
აღნიშნული რეგულაციების გამო კროკობეთის სახით სპონსორი დაკარგა ლოკომოტივმა, რის გამოც გუნდმა ვერცერთი წამყვანი მოთამაშე ვერ შეინარჩუნა, ევროპაბეთიც გავიდა საქართველოს ჩემპიონ ბათუმის დინამოდან.
