"არ შემიძლია ვითამაშო რუსეთის არმიის კლუბში" - თორნიკე შენგელიას კომენტარი
მოსკოვის ცსკა-ს 30 წლის ქართველმა კალათბურთელმა თორნიკე შენგელიამ რუსული კლუბი დატოვა.
ამის შესახებ თორნიკე შენგელიამ ესპანურ მედიასთან საუბარში დაადასტურა.
"ამ გადაწყვეტილებას უკრაინაში რუსეთის შეჭრის საპასუხოდ ვიღებ, არ შემეძლო რუსეთის არმიის კლუბში თამაშის გაგრძელება", - განაცხადა ესპანურ მედიასთან საუბარში ქართველმა კალათბურთელმა.
გუშინ ღამით მოსკოვიდან ქართველი სპორტსმენი ესპანეთში გაფრინდა, სადაც ამჟამად მისი ოჯახი იმყოფება.
საქართველოს საკალათბურთო ნაკრების კაპიტანი რუსეთის არმიის გუნდს 2021 წლის ზაფხულში შეუერთდა, რის გამოც ქართველი გულშემატკივრისგან კრიტიკის ქარ-ცეცხლში გაეხვა, თუმცა მისი შეცდომა აშკარად გამოასწორა.
რუსეთმა უკრაინის მიმართ საომარი მოქმედებები 24 თებერვლიდან დაიწყო და ომი მას შემდეგ მიმდინარეობს.
შეგახსენებთ, რომ საქართველოს ტერიტორიების 20% ოკუპირებულია რუსეთის მიერ.
