ლაპორტა: "პერესი გაკვირვებული დარჩა, ასეთ მარცხს არ ელოდა, მაგრამ კორექტული იყო, როგორც ყოველთვის"

"ბარსელონას" პრეზიდენტმა, ჟოან ლაპორტამ "ელ კლასიკოს" შემდეგ მადრიდელი კოლეგის, ფლორენტინო პერესის ემოციებზე ისაუბრა.

მოგეხსენებათ, 20 მარტს, ლა ლიგის 29-ე ტურის ეგიდით, კატალონიურმა გრანდმა "რეალი" "სანტიაგო ბერნაბეუზე" ანგარიშით 4:0 გაანადგურა.

"თამაშისგან სიამოვნება მივიღე. დავინახე, რომ ბევრად კარგად ვასპარეზობთ. ანგარიშზე ყურადღება არ გამიმახვილებია. თამაშს ვადევნებდი თვალყურს".

– იმოქმედა თუ არა ამ მარცხმა ფლორენტინოზე?

"ასეთი მარცხი უსიამოვნოა, ისიც გაკვირვებული იყო, რადგან ამას არ ელოდა. "რეალმა" ჩემპიონთა ლიგაზე ბრწყინვალე გამარჯვება მოიპოვა და შემიძლია წარმოვიდგინო, რომ მეტს ელოდნენ".

"მაგრამ ძალიან კარგად მომზადებულ "ბარსას" გადაეყარნენ. ხავი შესანიშნავად მუშაობს. ვხედავ, რომ გუნდი ფიზიკურად ჩინებულად არის მზად, რადგან ხუთშაბათს სტამბულში გვქონდა ნათამაშები".

"დაღლილობის არანაირი ნიშანი არ შეიმჩნეოდა. პირიქით, როცა ხავი ხედავს, რომ ფეხბურთელებს ძალები ეწურებათ, უმალვე ცვლილებებს აკეთებს და ეს დონის შენარჩუნების საშუალებას იძლევა".

"მადრიდელები ცოტა გავაკვირვეთ, მაგრამ პერესი კორექტული იყო, როგორც ყოველთვის. ვიცით, რომ ზოგჯერ ასეთებიც ხდება", - ციტირებს ლაპორტას სიტყვებს Mundo Deportivo.

"შეთავაზება ძალაში აღარ არის", - ლაპორტამ დემბელეს წასვლა-დარჩენის საკითხზე დეტალურად ისაუბრა