ბარსელონა ზაფხულში ცენტრალურ მცველს იყიდის — ხავიმ პრიორიტეტული სამიზნე შეარჩია
"ბარსელონას" ზაფხულის სატრანსფერო ფანჯარაზე დაცვის ხაზის ცენტრის გაძლიერება უნდა და პრიორიტეტული ვარიანტი შეარჩია.
ასე და ამგვარად, კატალონიური გრანდის მთავარ მწვრთნელს, ხავის თავის გუნდში "ნაპოლის" ცენტრალური მცველის, კალიდუ კულიბალის ხილვა უნდა.
"ლურჯ-ბროწეულისფრები" 30 წლის სენეგალელის თვისებებს აფასებენ: სისწრაფე, დასწრებაზე თამაში და ფიზიკური მონაცემები საჰაერო ორთაბრძოლებისას.
"ბარსელონა" ფეხბურთელის აგენტს უკვე დაუკავშირდა და სთხოვა, რომ ახალი კონტრაქტის თაობაზე ნეაპოლელებთან მოლაპარაკებების გამართვასთან დაკავშირებით არ იჩქაროს, წერს გავლენიანი გამოცემა AS-ი.
თავის მხრივ, "ნაპოლის" არანაკლებ 40 მილიონი ევროს მიღება უნდა და ფასის დაკლებაზე ან ტრანსფერში რომელიმე ფეხბურთელის ჩართვაზე უარს აცხადებს.
მიმდინარე სეზონში კულიბალიმ ყველა ტურნირზე ერთად 31 მატჩი ჩაატარა, 3 გოლი გაიტანა და 2 შედეგიანი გადაცემაც მიითვალა.
