"ჩემი ნომერ პირველი გულშემატკივარი დავკარგე", - ტევესმა მამის გარდაცვალების გამო კარიერა დაასრულა
არგენტინის ეროვნული ნაკრების ყოფილმა თავდამსხმელმა, კარლოს ტევესმა კარიერის დასრულება დაადასტურა.
"კარიერა დავასრულე, ვადასტურებ. ბევრი გუნდისგან მქონდა შემოთავაზება, მაგრამ როგორც ფეხბურთელმა უკვე ყველაფერი გავაკეთე, რაც შემეძლო. ამიტომაც მშვიდად ვარ", - ციტირებს 38 წლის ვეტერანის სიტყვებს TyC Sports-ი.
არგენტინელმა აღნიშნა, რომ ბუცების ლურსმანზე ჩამოკიდების თაობაზე მიღებულ გადაწყვეტილებაზე მამამისის გარდაცვალებამ იმოქმედა.
"ჩემი ნომერ პირველი გულშემატკივარი დავკარგე და ამის გამო თამაში აღარ მინდოდა", - თქვა კარლოსმა.
კარიერის მანძილზე ტევესს "ბოკა ხუნიორსში", "კორინთიანსში", "ვესტ ჰემში", "მანჩესტერ იუნაიტედში", "მანჩესტერ სიტიში", "იუვენტუსსა" და "შანხაი შენხუაში" უთამაშია. მისი ბოლო კლუბი "ბოკა" გახლდათ, საიდანაც გასულ ზაფხულს წავიდა.
ტევესი ინგლისის 3-გზის ჩემპიონია: ორჯერ "იუნაიტედის", ერთხელ კი "სიტის" რიგებში. "ემიუსთან" ერთად მან 2008 წელს ჩემპიონთა ლიგაც მოიგო. "იუვენტუსის" რიგებში იტალიის ჩემპიონის ტიტულს 2-ჯერ დაეუფლა.
გარდა ამისა, არგენტინის ნაკრებთან ერთად კარლოსი 2004 წელს ოლიმპიური ჩემპიონი გახდა.