კულიბალის ხელში ჩაგდება 3 ტოპ კლუბს სურს, ნაპოლიმ საწყისი ფასი დაასახელა

თარიღი: 12 ივნ 2022, 16:47

რამდენიმე კლუბის მხრიდან არსებული ინტერესის ფონზე, "ნაპოლიმ" გუნდის მცველს, კალიდუ კულიბალის ახალი კონტრაქტი შესთავაზა.

30 წლის სენეგალელს ნეაპოლელებთან მოქმედი ხელშეკრულების ვადა 2023 წლის ზაფხულში ეწურება.

როგორც Corriere dello Sport-ი წერს, "ნაპოლი" გამოცდილ უკანახაზელს 5-წლიან კონტრაქტსა და სეზონში 8 მილიონ ევროიან ხელფასს სთავაზობს. ამჟამად იგი წლიურად 6 მილიონს გამოიმუშავებს.

კულიბალიზე ინფორმაცია "პსჟ"-მ და "ჩელსიმ" მოითხოვეს, მაგრამ მისდამი ყველაზე კონკრეტულ ინტერესს "ბარსელონა" იჩენს. "ნაპოლი" მინიმუმ 40 მილიონ ევროს მოითხოვს. კალიდუს მომავალი შესაძლოა უახლოეს დღეებში გადაწყდეს.

გასულ სეზონში ნეაპოლელთა ერთ-ერთმა წამყვანმა ფეხბურთელმა ყველა ტურნირზე ერთად 34 მატჩი ჩაატარა, 3 გოლი გაიტანა და 3 შედეგიანი პასი გააკეთა.