"ბარსელონასთან შეთანხმებას მივაღწიეთ", - ბაიერნში ლევანდოვსკის ტრანსფერი დაადასტურეს
"ბაიერნში" თავდამსხმელ რობერტ ლევანდოვსკის ტრანსფერის თაობაზე "ბარსელონასთან" შეთანხმება დაადასტურეს.
"ბარსელონამ" შემოგვთავაზა თანხა, რომელიც ლევანდოვსკის გაყიდვას ჩვენთვის აბსოლუტურად გონივრულს ხდის. გარდა ამისა, ბოლო პერიოდში სატრანსფერო ბაზარზე ძალიან წარმატებულები ვიყავით და სადიო მანეს სახით მსოფლიო დონის შემტევი დავიმატეთ".
"ასე და ამგვარად, "ბარსელონასთან" შეთანხმებას მივაღწიეთ. თუმცა, ჯერჯერობით მხოლოდ სიტყვიერად, კონტრაქტს ჯერ კიდევ ველოდებით".
"ჩემი საქმე "ბაიერნისთვის" ყოველთვის საუკეთესოს მიღწევაში მდგომარეობს. ყოველთვის ყველაფერს ვაკონტროლებდით და ყოველთვის შესაბამისი პოზიციიდან ვმოქმედებდით".
"და საბოლოოდ ჩავთვალეთ, რომ უმჯობესია რობერტი გავუშვათ. ამასთან შეგუება შეგვიძლია", - თქვა "ბაიერნის" გენერალურმა დირექტორმა, ოლივერ კანმა Bild-თან ინტერვიუში.
გავრცელებული ინფორმაციით, "ბარსამ" და "ბაიერნმა" 33 წლის პოლონელი სუპერვარსკვლავის 50 მილიონ ევროიანი ტრანსფერი შეათანხმეს. თავად ლევანდოვსკი კატალონიურ გრანდთან 2025 წლამდე გათვლილ კონტრაქტს მოაწერს ხელს, თანამშრომლობის კიდევ ერთი სეზონით გაგრძელების შესაძლებლობით.
