ლევანდოვსკის აგენტი: "მადლობა ბაიერნს, რომ პატივი სცა რობერტის ოცნებას ახალი კარიერული გამოწვევის თაობაზე"
"ბაიერნის" თავდამსხმელის, რობერტ ლევანდოვსკის აგენტმა, პინი ზაჰავიმ პოლონელი სუპერვარსკვლავის "ბარსელონაში" გადასვლაზე კომენტარი გააკეთა.
"მინდა მადლობა გადავუხადო "ბაიერნს" - განსაკუთრებით ოლივერ კანსა და ჰასან სალიჰამიჯიჩს - იმისათვის, რომ საბოლოოდ გაიგეს და პატივი სცეს რობერტის ოცნებას ახალი კარიერული გამოწვევის თაობაზე".
"ალემანი ("ბარსას" დირექტორი), სალიჰამიჯიჩი და მე პარასკევს შუაღამემდე ვსაუბრობდით მობილური ტელეფონის საშუალებით. გვინდოდა ყველასათვის საუკეთესო გამოსავალი გვეპოვა. საბოლოო ჯამში, ვფიქრობ, ამ ისტორიით ყველა სარგებელს მიიღებს".
"რობერტი თავაწეული იმსახურებს ახალ გამოწვევას, ამდენი წლის მანძილზე "ბაიერნისადმი" ერთგულების შემდეგ. კლუბმა კი ძალიან კარგი ფინანსური კომპენსაცია მიიღო".
"ბაიერნი" ყოველთვის მსოფლიოს ერთ-ერთი უდიდესი კლუბი იქნება. მომავალ სეზონში წარმატებებს ვუსურვებ", - თქვა ზაჰავიმ Sky Sport De-სთან ინტერვიუში.
მოგეხსენებათ, "ბარსამ" და "ბაიერნმა" 33 წლის პოლონელი სუპერვარსკვლავის 50 მილიონ ევროიანი ტრანსფერი შეათანხმეს. თავად ლევანდოვსკი "ლურჯ-ბროწეულისფრებთან" 2025 წლამდე გათვლილ კონტრაქტს მოაწერს ხელს, თანამშრომლობის კიდევ ერთი სეზონით გაგრძელების შესაძლებლობით.
