ჩელსიმ პსჟ-ს კიმპემბეს ტრანსფერზე პირველი ოფიციალური წინადადებით მიმართა
"ჩელსიმ" "პსჟ"-ს ცენტრალური მცველის, პრესნელ კიმპემბეს სანაცვლოდ 47 მილიონი ევრო შესთავაზა, იტყობინება გავლენიანი გამოცემა Sky Sports-ი.
მოგეხსენებათ, კლუბებმა აქამდე 26 წლის ფრანგის ტრანსფერი უკვე განიხილეს, თუმცა ეს "არისტოკრატების" პირველი ოფიციალური წინადადებაა.
"პსჟ" მზადაა კიმპემბეს შეელიოს, თუ ფინანსურ მოთხოვნებს დაუკმაყოფილებენ, რაც ჯერ არ მომხდარა, მაგრამ მოლაპარაკებები გრძელდება. თავის მხრივ, "ჩელსის" მარცხენა ცენტრალური მცველის შეძენა უნდა.
პრესნელს პარიზელთა რიგებში საერთო ჯამში 234 მატჩი აქვს ჩატარებული, საიდანაც 14 სარეზერვო გუნდის მაისურით გამართა. მის აქტივში 4 გოლი და 2 შედეგიანი გადაცემაა.
აღსანიშნავია, რომ კიმპემბემ "პსჟ"-სთან ერთად საფრანგეთის ჩემპიონატი 6-ჯერ, ხოლო ქვეყნის თასი 5-ჯერ მოიგო. გარდა ამისა, იგი 2018 წელს ეროვნულ ნაკრებთან ერთადა მსოფლიო ჩემპიონი გახდა.
