გვარდიოლამ დაადასტურა: "ზინჩენკო სხვა გუნდში გადადის და უკვე დავემშვიდობეთ"
"მანჩესტერ სიტის" მთავარმა მწვრთნელმა, ხოსეპ გვარდიოლამ გუნდის მარცხენა მცველის, ალექსანდრ ზინჩენკოს "არსენალში" ტრანსფერი დაადასტურა.
"ჩვენი კლუბის სახელით ალექსანდრს მადლობას ვუხდი იმისათვის, რაც მოედანზე და მის ფარლებს გარეთ გააკეთა", - ციტირებს ესპანელი სპეციალისტის სიტყვებს Mirror-ი.
"გუშინ ალექსთან ერთად კარგი დრო გავატარეთ, რადგან სათანადოდ შევძელით მასთან დამშვიდობება".
"სამწუხაროდ, გაბისთან (გაბრიელ ჟეზუსი) და რაჰიმთან (სტერლინგი) ეს ვერ მოვახერხეთ, მაგრამ მასთან (ზინჩენკო) გამოგვივიდა. "არსენალში" გადადის", - დასძინა გვარდიოლა.
აქამდე გავრცელებული ინფორმაციით, "ქალაქელები" 25 წლის უკრაინელი ფეხბურთელის სანაცვლოდ 30+2 მილიონ ფუნტს მიიღებენ.
ზინჩენკომ, რომელიც "სიტის" ღირსებას 2016 წლის ზაფხულიდან იცავდა, გასულ სეზონში ყველა ტურნირზე ერთად 28 მატჩი ჩაატარა და 5 შედეგიანი გადაცემაც მიითვალა.
