მანჩესტერ იუნაიტედი რონალდუსგან, რომელიც ჯერ კიდევ არ დაბრუნებულა, ახსნა-განმარტებას ითხოვს
"მანჩესტერ იუნაიტედის" ხელმძღვანელობა გუნდის თავდამსხმელ კრიშტიანუ რონალდუსგან ახსნა-განმარტებას ელოდება.
როგორც Manchester Evening News-ი წერს, კლუბი სიტუაციის გარკვევის მიზნით პორტუგალიელს სთხოვს შეატყობინოს, როდის აპირებს "ეშმაკუნების" განკარგულებაში დაბრუნებას და წინასასეზონო მზადების დაწყებას.
"ემიუმ" ტაილანდისა და ავსტრალიის ტურნე გუშინ დაასრულა და "ასტონ ვილასთან" (2:2) მატჩის დასრულებისთანავე მანჩესტერში დაბრუნდა. გუნდის მთავარი მწვრთნელი, ერიკ ტენ ჰაგი ფეხბურთელებს ორშაბათს დაასვენებს, სამშაბათს კი გუნდი სეზონისთვის მზადებას განაახლებს. კლუბი ოსლოში "ატლეტიკოსთან" გამართავს ტესტ-მატჩს, "ოლდ ტრაფორდზე" კი "რაიო ვალეკანოს" უმასპინძლებს.
ვარაუდობდნენ, რომ რონალდუ "ემიუში" შვებულების შემდეგ 4 ივლისს დაბრუნდებოდა, მაგრამ ფორვარდი პორტუგალიაში დარჩა და გუნდის ბაზაზე არ გამოცხადდა. ოფიციალური ცნობით, ამის მიზეზი ოჯახური გარემოებებია, თუმცა, სხვადასხვა წყაროს თანახმად, კრიშტიანუს ჩემპიონთა ლიგაზე მოასპარეზე გუნდში უნდა გადასვლა.
მოგეხსენებათ, 37 წლის სუპერვარსკვლავს მანიკუნიანელებთან მოქმედი კონტრაქტის ვადა 2023 წლის ზაფხულამდე აკავშირებს, გუნდში იგი გასული სეზონის სტარტზე ტურინის "იუვენტუსიდან" დაბრუნდა.
