ლევანდოვსკი: "ბარსელონას ძალიან ძლიერი გუნდი ჰყავს, ტიტულებისთვის საბრძოლველად მზად ვართ"
"ბარსელონას" თავდამსხმელმა, რობერტ ლევანდოვსკიმ ახალ სეზონში კატალონიური გრანდის პერსპექტივების შესახებ ისაუბრა.
"ძალიან ძლიერი გუნდი გვყავს, ტიტულებისთვის საბრძოლველად მზად ვართ. ყოველთვის ყველა თამაშის მოგებაზე და გოლის გატანაზე ვფიქრობ, ისეთი მწვრთნელის გვერდით კი, როგორიც ხავია, წარმატების მიღწევა შეგვიძლია".
"ვხედავ, რას ვაკეთებთ ვარჯიშებზე, როგორ ვმუშაობთ წინასასეზონო შეკრებაზე. ყველა ჩვენი ტრანსფერი მარწმუნებს იმაში, რომ სწორ გზას ვადგავართ, სულმოუთქმელად ველოდები სეზონის დაწყებას".
"ბევრჯერ მითამაშია ესპანური კლუბების წინააღმდეგ ჩემპიონთა ლიგაზე, ასე რომ ჩემთვის ეს რაღაც ახალი არ იქნება. თუ საერთაშორისო დონის ფეხბურთელი ხარ, ნებისმიერი გამოცდისთვის მზად უნდა იყო, არ აქვს მნიშვნელობა, ვისთან გიწევს თამაში. შენი საუკეთესო მხარეები უნდა წარმოაჩინო".
"გამოცდილი ფეხბურთელი ვარ და ამ გამოწვევისთვის მზად გახლავართ. ამავდროულად, ესპანეთის ჩემპიონატში უფრო მეტი მატჩი ტარდება, ვიდრე ბუნდესლიგაში, ამიტომაც კიდევ უფრო მეტი გოლის გატანის შესაძლებლობა მექნება", - ციტირებს პოლონელის სიტყვებს ESPN-ი.
