ჩელსის ხელმძღვანელობა დაცვის ხაზის გაძლიერებას გეგმავს და ორი ფეხბურთელის ტრანსფერზე მუშაობს
"ჩელსის" ხელმძღვანელობა მიმდინარე ზაფხულის სატრანსფერო ფანჯარაზე ორი უკანახაზელის შეძენას აპირებს.
ლონდონური კლუბი "ლესტერის" ცენტრალური მცველის, უესლი ფოფანასა და "ინტერის" ლატერალის, დენზელ დუმფრისის ხელში ჩაგდებაზე მუშაობს, წერს The Athletic-ი.
"მელიები" 21 წლის ფრანგს 80-85 მილიონ ფუნტად აფასებენ, მაგრამ "არისტოკრატებს" იმედი აქვთ, რომ ტრანსფერში ერთ-ერთი ფეხბურთელის ჩართვით ფასს შეამცირებენ.
აღსანიშნავია, რომ "ჩელსის" ბოსები ორივე ზემოთნახსენები მოთამაშის დამატებას გეგმავენ და არა ერთ-ერთის.
გასულ სეზონში ფოფანამ ყველა ტურნირზე ერთად ტრავმის გამო მხოლოდ 12 მატჩი ჩაატარა და 1 გოლი გაიტანა, ხოლო 26 წლის ჰოლანდიელმა "ნერაძურის" ღირსება 45 შეხვედრაში დაიცვა, მეტოქის კარი 5-ჯერ აიღო და 7 ასისტიც მიითვალა.