ოფიციალურად: ვინის წითელი ბარათი გაუუქმეს, ვალენსია მკაცრად დაისაჯა

როგორც იცით, "მესტალიაზე" გამართულ მატჩში ბრაზილიელს ჯერ ადგილობრივ ქომაგთან მოუვიდა კონფლიქტი, შემდეგ კი მასპინძელი გუნდის ფეხბურთელებთან და მათ შორის - გიორგი მამარდაშვილთანაც. საბოლოოდ, თამაში შვიდი წუთით შეწყდა, ვინის კი მსაჯმა წითელი ბარათი უჩვენა. 

თამაშის შემდეგ, მთავარი სალაპარაკო თემა რეალის შემტევის წინააღმდეგ მასობრივი რასისტული შეურაცხყოფები გახდა. 

ფედერაციის მიერ მიღებული გადაწყვეტილების თანახმად, ვინისიუსის წითელი ბარათი გაუქმდა. ამის მიზეზი ის გახდა, რომ ოფიციალური ვერსიით, გადაწყვეტილების მიღებისას, ვიდეორეფერიმ კონტექსტიდან ამოგლეჯილი და მიკერძოებული კადრები გამოიყენა. შესაბამისად, უკვე დღეს, ვინი რაიო ვალეკანოსთან მატჩში მოახერხებს მონაწილეობის მიღებას. 

გარდა ამისა, მკაცრად დაისაჯა ვალენსიაც - მარიო კემპესის სახელობის ტრიბუნა (ის, რომელიც გიორგი მამარდაშვილის კარის უკან მეორე ტაიმში იყო) ხუთი მატჩით დაიხურება, ვალენსიას კი, საკუთარი ქომაგების გამო, 45-ათასიანი ჯარიმა დაეკისრება. 

და ბოლოს, ვინისიუსის წინააღმდეგ რასისტული შეურაცხყოფების გამო, მესტალიაზე მყოფი სამი ადამიანი უკვე იდენტიფიცირებული და დაკავებულია. უახლოეს მომავალში, მათ სასამართლოს წინაშე მოუწევთ წარდგენა.