გიორგი ჩაკვეტაძემ გუნდთან ერთად ვარჯიში განაახლა
საქართველოს ნაკრების ნახევარმცველმა გიორგი ჩაკვეტაძემ რამდენიმედღიანი დასვენების შემდეგ გუნდთან ერთად ვარჯიში განაახლა.
GOAL.GE-ს ინფორმაციით, 22 წლის შემტევმა დღეს გენტის იმ ფეხბურთელებთან ერთად ივარჯიშა მოედანზე, რომლებმაც ანორთოსისის წინააღმდეგ არ ითამაშეს, ან სკამიდან ჩაერთნენ თამაშში და ფეხბურთელი თავს კარგად გრძნობს, ემზადება კვირას, 3 ოქტომბერს, ანტვერპის წინააღმდეგ სათამაშოდ.
ეს ამბავი ძალიან კარგია, რაც იმას ნიშნავს, რომ 4 ოქტომბერს გიორგი საქართველოში გამოემგზავრება საბერძნეთთან და კოსოვოს ნაკრებებთან დაპირისპირებისთვის.
გიორგი ჩაკვეტაძეს კონფერენს ლიგის ჯგუფური ეტაპის მე-2 ტურში ანორთსისის(2-0) წინააღმდეგ ბარძაყის დაზიანების გამო არ უთამაშია, თუმცა როგორც ჩვენ შევიტყვეთ, ქართველ ნახევარმცველს დაჭიმულობა ჰქონდა, რის გამოც სამედიცინო შტაბისგან 2-3-დღიანი დასვენების რეკომენდაცია მიიღო, გუნდმა კი არ გარისკა.
როგორც იცით, საქართველოს ნაკრებს ტრავმის გამო უკვე გამოაკლდა ოთარ კიტეიშვილი, რომლის ნაცვლადაც ვილი სანიოლმა სიაში გიორგი ქვილითაია დაამატა. "ჯვაროსნები" საბერძნეთთან საკუთარ მოედანზე 9 ოქტომბერს ითამაშებენ, ხოლო 12 ოქტომბერს სტუმრად კოსოვოს დავუპირისპირდებით.
