"პსჟ-ს მხოლოდ ერთ კლუბზე გავცვლიდი", - მბაპეს სატრანსფერო საგა გრძელდება
"პარი სენ-ჟერმენის" თავდამსხმელმა, კილიან მბაპემ L’Équipe-თან ინტერვიუში თავისი მომავლის შესახებ ისაუბრა. ფრანგმა ფორვარდმა მადრიდის "რეალში" გადასვლის სურვილი კიდევ ერთხელ დააფიქსირა.
"რეალმა პარი სენ-ჟერმენს წინადადებით მიმართა. ხალხი თვლის, რომ პსჟ კონტრაქტის გახანგრძლივების თაობაზე ექვსჯერ ან შვიდჯერ უარით გავისტუმრე, ეს ტყუილია!
ამის გარდა, ხალხს მიაჩნია, რომ არ მსურს ლეონარდოსთან მოლაპარაკებების გამართვა, თუმცა საუბრისთვის ყოველთვის მზად ვარ, როგორც მასთან, ისე ხელაიფისთანაც.
არც პსჟ-ს გასახდელში სიტუაციის არევა შეესაბამება სიმართლეს. კლუბის პრეზიდენტი მთელი სამყაროს გასაგონად ამბობდა, რომ უფასოდ არ გამიშვებდა, მე კი ვფიქრობდი, თუ რა მეშველებოდა.
მოგვიანებით მივედი იმ დასკვნამდე, რომ პარიზულ კლუბს უბრალოდ ჩემი შენარჩუნება სურს. აქაურობა ძალიან მიყვარს და თუ წასვლა იქნებოდა გარდაუვალი, მხოლოდ მადრიდში გადავიდოდი".
შეგახსენებთ, რომ "ლურჯ-წითლების" შემტევის ამჟამინდელი კონტრაქტი გათვლილია 2022 წლის ზაფხულამდე, რომლის გახანგრძლივებას თავად მოთამაშე არ ჩქარობს.
