ოლდ ტრაფორდის რეკორდი 2021 წელს, რომელიც დაამყარა სალაჰმა და არა მანჩესტერის რომელიმე ფეხბურთელმა

თარიღი: 27 Oct 2021, 12:10

"ლივერპულის" ლიდერმა, მოჰამედ სალაჰმა 2021 კალენდარულ წელს "ოლდ ტრაფორდზე" გაიტანა ექვსი გოლი, რაც აღნიშნულ სტადიონზე მიმდინარე წელს საუკეთესო შედეგია.

გასულ კვირას შესრულებულ ჰეტ-ტრიკამდე, ეგვიპტელმა თავდამსხმელმა "მანჩესტერ იუნაიტედს" შეუსრულა დუბლი ინგლისის თასზე და ერთი ბურთიც ეპლ-ის გასულ სეზონშიც გაიტანა.

ცხადია, ეს ყველაფერი სწორედ "წითელი ეშმაკების" სტადიონზე. მერსისაიდელთა ფორვარდზე მეტი გოლი 2021 წელს "ოლდ ტრაფორდზე" აქვს გატანილი მხოლოდ ბრუნო ფერნანდეშს, მაგრამ ერთი საინტერესო დეტალი ამ საკითხშიც არის.

პორტუგალიელი შემტევი ნახევარმცველის ანგარიშზე ფიქსირდება 10 ბურთი, აქედან ხუთი მას აქვს გატანილი უშუალოდ თამაშიდან, დარჩენილი ხუთი კი 11-მეტრიანებით.

ეს ნიშნავს იმას, რომ უშუალოდ თამაშიდან გატანილი გოლებით, "წითლების" მე-11 ნომერზე წინ წელს არცერთი "მანკუნიანელი" არ არის. კიდევ ერთი საინტერესო დეტალი: 29-წლის გოლეადორს საამისოდ სულ რაღაც 3 მატჩი დასჭირდა.