"კაკაბაძის გასროლა სეზონის საუკეთესო გოლებს შორის მოხვდება", - კრაკოვიას მწვრთნელი
"კრაკოვიას" მთავარმა მწვრთნელმა, იაცეკ ზელინსკიმ ოთარ კაკაბაძის შესახებ ისაუბრა. ცხადია, პოლონელ დამრიგებელს ქართველი მარჯვენა მცველის ულამაზესი გოლი არ გამორჩენია.
"კაკაბაძის გასროლა სეზონის საუკეთესო გოლებს შორის მოხვდება. მისმა შემოყვანამ გაამართლა, ის კრაკოვიას ძალიან დაეხმარა. რატომ არ დავაყენე ოთარი ძირითადში?
საქართველოს ნაკრებში ჩატარებული ორი შეხვედრის შემდეგ, ის იყო გადაღლილი, რადგან აქ ჩამოსასვლელად თბილისიდან მას ჯერ მიუნხენში გაფრენა მოუწია. სწორედ ეს არის ქართველის სკამზე დატოვების მიზეზი.
ის ჩვენი გუნდის უმნიშვნელოვანესი ფეხბურთელია და მასზე დიდ იმედებს ვამყარებთ", - განაცხადა პოლონური გუნდის მწვრთნელმა, რომლის შეგირდებმა ვაკო გვილიას "რაკუვს" მოუგეს.
რაც შეეხება "თეთრ-წითლების" ვინგბექს, მოედანზე ის შემოვიდა 61-ე წუთზე, ზუსტად რვა წუთში კი მაყურებელმა ზემოთხსენებული შედევრი იხილა. "კრაკოვიამ" საბოლოოდ 2:1 იმარჯვა.
