გასაჯაროვდა, თუ რა თანხას გადაუხდის ბარსელონა ლევანდოვსკის აგენტს საკომისიოს სახით
ცნობილი გახდა, თუ რა თანხას გადაუხდის "ბარსელონა" თავდამსხმელ რობერტ ლევანდოვსკის აგენტს საკომისიოს სახით.
მოგეხსენებათ, 33 წლის პოლონელი სუპერვარსკვლავი კატალონიაში "ბაიერნიდან" გადავიდა და როგორც დაიწერა, ესპანურ გრანდთან 3-წლიან კონტრაქტს მოაწერს ხელს, თანამშრომლობის ერთი სეზონით გაგრძელების შესაძლებლობით.
რადიო Onda Cero-ს წამყვანის, ალფრედო მარტინესის ინფორმაციით, პინი ზაჰავი, ლევანდოვსკის წარმომადგენელი, ითხოვდა, რომ ტრანსფერის შედეგად მას ყოველწლიურად 5 მილიონი ევრო გადაუხადონ, საერთო ჯამში - 20 მილიონი.
შეგახსენებთ, "ლურჯ-ბროწეულისფრები" მიუნხენელებს გამოცდილი ფორვარდის სანაცვლოდ 50 მილიონს გადაუხდიან, საიდანაც 5 მილიონი ბონუსების სახით არის გათვალისწინებული.
ცნობისთვის, ლევანდოვსკიმ, რომელიც "ბაიერნში" 2014 წლიდან ირიცხებოდა, გასულ სეზონში ყველა ტურნირზე ერთად 50 მატჩი ჩაატარა, 46 გოლი გაიტანა და 7 შედეგიანი პასიც მიითვალა.
