დეტალური განხილვა — რამდენად რეალურია ხვიჩა კვარაცხელიას ტრანსფერი ბაიერნში?
გერმანული გამოცემა Express-ის ინფორმაციით, ხვიჩა კვარაცხელიათი "ბაიერნი" ინტერესდება. აქამდე, ქართველისადმი მიუნხენელთა ინტერესზე 19 წლის ფეხბურთელის აგენტმა, მამუკა ჯუღელმაც ისაუბრა.
რამდენად რეალურია ეს ტრანსფერი? როგორც რუსული Спорт-Экспресс იტყობინება, "ბაიერნსა" და "რუბინს" შორის არანაირი ოფიციალური მოლაპარაკებები არ ყოფილა. ჭორის დონეზე კი მუდმივად იწერება, რომ ხვიჩა მომავალში ევროპულ ტოპ-კლუბში ითამაშებს.
თუმცა, "ბაიერნთან" დაკავშირებული სიახლე დასაბუთებულია: 17 წლის ასაკში ხვიჩამ მიუნხენურ კლუბთან მოლაპარაკებები უკვე გამართა. როგორც ჯუღელმა თქვა, კვარაცხელიას პირადად ჰასან სალიჰამიჯიჩი ესაუბრა - "რეკორდმაისტერის" სპორტული დირექტორი. ქართველს კლუბის ბაზა აჩვენეს, კონტრაქტის დეტალები გააცნეს. მიუხედავად ამისა, სამი წლის წინ ტრანსფერი არ შედგა: თავად ხვიჩაც არ იყო საქართველოდან უმალვე დიდ ევროპულ კლუბში გადასვლისთვის და "ბაიერნმა" გადაწყვიტა არ გაერისკა, ახალგაზრდა ფეხბურთელზე უკეთესად დაკვირვება არჩია. საბოლოო ჯამში, კვარაცხელია მოსკოვის "ლოკომოტივში" გადავიდა, შემდეგ კი "რუბინში" თამაშით სახელი გაითქვა და ეროვნული ნაკრების ლიდერადაც იქცა.
დღეს ხვიჩა რუსეთის ჩემპიონატის ერთ-ერთი საუკეთესო ფეხბურთელია, საქართველოს ნაკრების მთავარი ვარსკვლავი - მარტის თვეში ესპანეთთან და საბერძნეთთან გამართულ შეხვედრებში გოლების გატანა მოახერხა. "რუბინის" შემტევი ნახევარმცველის აქტივში 2022 წლის მუნდიალის შესარჩევი ეტაპის სამ შეხვედრაში 15 წარმატებული დრიბლინგია - ევროპაში მოთამაშე ყველა ფეხბურთელზე მეტი. ლოგიკურია, ახლა სულ უფრო მეტი ინფორმაცია გაჩნდება იმის თაობაზე, თუ სად შეიძლება გადავიდეს ზაფხულში.
თუმცა, "რუბინის" გენერალურმა დირექტორმა, რუსტემ საიმანოვმა ამ კვირაში განაცხადა, რომ კლუბს ხვიჩას გაყიდვა არ უნდა. "ძალიან მინდა მომდევნო სეზონშიც ჩვენთან იასპარეზოს. ყველაფერს გავაკეთებ მის შესანარჩუნებლად. მაგრამ მესმის, რომ მისი შეკავებაც არ შეიძლება", - თქვა მან БИЗНЕС Online-თან ინტერვიუში.
Спорт-Экспресс-ის ინფორმაციით, მიუხედავად მენეჯერის განცხადებისა, "რუბინში" მაინც არ გამორიცხავენ ამ წელს კვარაცხელიას გაყიდვის ვარიანტს. განსაკუთრებით, თუ კლუბი ევროთასებზე ვერ მოხვდება, წინადადება კი ფინანსურად სარფიანი იქნება. დღესდღეობით ხვიჩაზე სერიოზული მოთხოვნილებაა, ამიტომაც "რუბინში" მისი დიდი ხნით შენარჩუნება არ სურთ. უკვე დაიწერა, რომ კლუბი წინადადებებს 15 მილიონი ევროდან განიხილავს და ტრანსფერში ქართველის შემდგომი გაყიდვის პროცენტის პუნქტის ჩართვას აპირებს.
ამავდროულად, "რუბინში" უნდათ, რომ კვარაცხელია არა ევროპული ელიტის კლუბში, არამედ ტოპ-ჩემპიონატის მეორე ეშელონის გუნდში გადავიდეს, რომელიც ჩემპიონთა ლიგის საგზურისთვის იბრძვის. ხვიჩას ტოპ-კლუბში გადასვლამდე საშუალო დონის გუნდი სჭირდება. ეს თქვა "რუბინის" მთავარმა მწვრთნელმა, ლეონიდ სლუცკიმაც.
"ბაიერნში" კონკურენციის სრულიად სხვა დონეა და ის, რომ ხვიჩას მოედანზე რეგულარულად ვიხილავთ, შეცვლაზეც კი, დადასტურებული ფაქტი არ არის. კინგსლი კომანი, ლეროი სანე, სერჟ გნაბრი - საეჭვოა, ახლა კვარაცხელია რომელიმე მათგანზე უკეთესი იყოს. თითოეულ მათგანს მიუნხენში გადასვლამდე ევროპაში შედარებით დაბალი დონის კლუბებში რამდენიმე სეზონი აქვს გატარებული. გნაბრი "ბაიერნში" "არსენალის" რეზერვებიდან გადავიდა, იასპარეზა "ვესტ ბრომვიჩში", "ვერდერსა" და "ჰოფენჰაიმში", სანემ "შალკეში" მოასწრო ორი სეზონის გატარება "მანჩესტერ სიტიში" გადაბარგებამდე, საიდანაც უკვე უკან გერმანიაში დაბრუნდა.
ამიტომაც, თუ "ბაიერნი" ნამდვილად მზად არის ხვიჩას ყიდვისთვის, მაშინ, ალბათ, ბუნდესლიგის სხვა კლუბში განათხოვრების ვარიანტით, როგორც ეს გნაბრის შემთხვევაში იყო, რომელიც "ვერდერიდან" შეისყიდეს და "ჰოფენჰაიმში" გაუშვეს არენდით. ანდაც, "რუბინში" კიდევ ერთი წლით დატოვების ვარიანტით.
მაგალითად, "კრასნოდარი" "რუბინს" კვარაცხელიას სანაცვლოდ 10 მილიონ ევროს სთავაზობდა, მაგრამ 2-სეზონიანი იჯარით. იქაც ესმოდათ, რომ ხვიჩას ხელსაყრელი გარემო და მწვრთნელის ნდობა სჭირდება, რაც "რუბინში" აქვს. ამ დროისთვის, კვარაცხელია "ბაიერნის" ძირითადისთვის მზად ნამდვილად არ არის. ეს მისი კარიერისთვის რისკია: იქ გადასვლა და თადარიგში დარჩენა - ახალგაზრდა ფეხბურთელისთვის დარტყმაა, რომელსაც რეგულარული სათამაშო პრაქტიკა და განვითარება სჭირდება.
ასევე იხილეთ:
"სანჩოსა და კოსტას უკვე სჯობს", - რას წერენ გერმანელი ფანები კვარაცხელიაზე?
გოოოოლ! - კვარაცხელიას ულამაზესი გოლი რუბინში
კვარაცხელიას კომენტარი დღევანდელ მატჩში გატანილი ულამაზესი გოლის შემდეგ
