კრიშტიანუ რონალდუს ტრანსფერმა ტურინის "იუვენტუსში" თავის დროზე მსოფლიო ჩემპიონატის მატჩებიც კი დაჩრდილა. 18 აგვისტოს შედგა პორტუგალიელის დებიუტი ახალ კლუბში და უნდა ითქვას, რომ თამაშის შემდეგ გულშემატკივართა რეაქცია არაერთგვაროვანია.

ზოგი აქებს რონალდუს. არიან ისეთებიც, ვინც უკვე ლანძღავენ პორტუგალიელს, ყველაზე ადეკვატურ ქომაგებს კი არ გამოაქვთ ნაადრევი დასკვნები სერია ა-ს პირველი ტურის შემდეგ. დეტალურად განვიხილოთ "კიევოსთან" მატჩი.



ტაქტიკური სქემა უცვლელი დარჩა. კვლავ 4-2-3-1, თუმცა რამდენიმე ახალი სახელით შემადგენლობაში. მოედანზე იყო კრიშტიანუც, რომელმაც მასიმილიანო ალეგრის მონახაზში გონსალო იგუაინის ადგილი დაიკავა.

პორტუგალიელის უკან განლაგებულნი იყვნენ დიბალა, კოსტა და კუადრადო. მოედნის ცენტრი ეკავათ პიანიჩსა და რონალდუსთვის კარგად ნაცნობ ხედირას. აგრეთვე აღსანიშნავია კიელინი-ბონუჩის ტანდემის აღდგენა, ჟოაო კანსელოს დებიუტი და პირველად 2001 წლის შემდეგ - "იუვეს" კარები ჯანლუიჯი ბუფონის გარეშე.



ლეგენდარული კიპერის ადგილი ვოიცეხ შენსნიმ დაიკავა. რაც შეეხება მატჩს, "ბებერმა ქალბატონმა" ანგარიში უკვე მე-3 წუთზე გახსნა, გამოირჩა ხედირა. კრიშტიანუც აქტიურად ცდილობდა გოლის გატანას, თუმცა ზოგჯერ პორტუგალიელი იწეოდა ცენტრში და მარცხნივ, რითაც თავადაც ცდილობდა მომენტის შექმნას.

"კიევოს" მცველების ყურადღება ცხადია ვარსკვლავურ პორტუგალიელზე იყო გადატანილი. "მფრინავი ვირები" არ ერიდებოდნენ უხეშობას რონალდუს გასანეიტრალებლად.



შეიძლება ითქვას, რომ მათ ეს გამოუვიდათ, რადგან კრიშტიანუმ ვერ მოახერხა გოლის გატანა. ამასთან ერთად ვერონელები მთელი 19 წუთის მანძილზე უგებდნენ სახელოვან მეტოქეს.

დიახ, 75-ე წუთისთვის ანგარიში 2:1 იყო მასპინძლების სასარგებლოდ. ალეგრიმ მატჩის გადასარჩენად შეუშვა მანჯუკიჩი და ბერნარდესკი, რონალდუ კი საბოლოოდ დამკვიდრდა მისთვის მშობლიურ მარცხენა ფლანგზე.



ცვლილებებმა გაამართლა, განსაკუთრებით ეს ხორვატი ფორვარდის შემოსვლაზე ითქმის. მარიოს მოედანზე ყოფნით პორტუგალიელიც ახლებურად ათამაშდა.

ზოგადად მანჯუკიჩი არის იდეალური პარტნიორი კრიშტიანუსთვის, რადგან ხორვატი მიეკუთვნება თავდამსხმელთა იმ კატეგორიას, რომლებიც ფიქრობენ არა საკუთარ ბომბარდირულ მაჩვენებელზე, არამედ გუნდურ ინტერესებზე.



ასეთი იყო კარიმ ბენზემა მადრიდის "რეალში". ფრანგი მარიოს მსგავსად აგრეთვე ცენტრ-ფორვარდია, მაგრამ "სამეფო კლუბის" შეტევაში გოლების გატანით დაკავებული იყო რონალდუ, ბენზემა კი მისი ერთგული დამხმარეს როლში იმყოფებოდა. დიდი ალბათობით მანჯუკიჩი კარიმის ტურინული ვერსია გახდება.

ცნობისთვის იგუაინს არასდროს შეეძლო მსგავსი ფუნქციების საკუთარ თავზე აღება. არგენტინელი ბუნებით ბომბარდირია, სწორედ ამიტომ მოუწია მას "რეალიდან" და "იუვედან" წასვლა. ერთ სამზარეულოში ვერ იქნება ორი შეფ-მზარეული - ფრაზა, რომელიც ყველაზე ნათლად ასახავს გონსალოსა და კრიშტიანუს კავშირს, უფრო სწორად მის არ არსებობას.



დავუბრუნდეთ უშუალოდ მატჩს. თამაშის ბოლოსკენ "ბიანკონერიმ" მაინც მოახერხა გამარჯვების მოპოვება. გამოირჩა ერთ-წლიანი მივლინებიდან დაბრუნებული ბონუჩი, შემდეგ კი ისევ და ისევ მანჯუკიჩი.

რონალდუ აქტიურობდა, ბევრსაც ურტყამდა, მაგრამ "კიევოს" კარები მისთვის აუღებელ ციხესიმაგრედ დარჩა. ჯამში პორტუგალიელი თავის თამაშს ახვევდა მეტოქეს, "იუვენტუსი" კი თავისას.



კრიშტიანუს ტრანსფერის შემდეგ ალეგრიმ თქვა, რომ ის ახალს ვეღარაფერს ასწავლის რონალდუს. მასიმილიანო შეცდა, იტალიელმა აუცილებლად უნდა გამონახოს პორტუგალიელის ინტეგრირების გზა "ბებერი ქალბატონის" ტაქტიკაში.

წინააღმდეგ შემთხვევაში "იუვეს" შვიდიანი კვლავ ინდივიდუალურად ეცდება გოლის გატანას, თუმცა რეალურად შედეგს ისევ სხვები დადებენ. პირველი ტურის შემდეგ დასკვნების გამოტანა ჯერ ნაადრევია. "კიევოსთან" მატჩი იყო სერიალის ერთგვარი პილოტური ეპიზოდი.

წინ კიდევ 37 სერიაა. ვნახოთ, როგორ აათამაშებს რეჟისორი თავისი ფილმის მთავარ გმირს. რაც არ უნდა იყოს "ბებერმა ქალბატონმა" 3 ქულა მოიპოვა, ისევე როგორც კარლო ანჩელოტის "ნაპოლიმ". ველოდებით "ინტერს", "მილანსა" და "რომას".

გავიხსენოთ კიდევ ერთხელ - კიევო-იუვენტუსი 2:3