დღეს „დილამ“ მორიგი ამხანაგური მატჩი გამართა რუმინულ „ვიტორულ კონსტანტასთან“. პირველი ტაიმი გარდამავალი უპირატესობით მიმდინარეობდა. 25-ე წუთზე მიხაილ გორელიშვილმა ირაკლი მოდებაძე მეკარესთან პირისპირ გაიყვანა, რომელიც საჯარიმოში წააქციეს და მთავარმა არბიტრმა რუმინელთა კარში თერთმეტმეტრიანი დანიშნა, რომელიც თავად დაზარალებულმა უნაკლოდ შეასრულა 1:0. მსაჯის მიერ დამატებულ მეორე წუთზე გორელებმა დაცვაში შეცდომა დაუშვეს და მეტოქემ ანგარიში გაათანაბრა 1:1. მეორე ტაიმში თანაბარი ბრძოლა მიმდინარეობდა. აღსანიშნავია ილურიძის მომენტი, როდესაც მეკარესთან ერთი-ერთზე გავიდა და მოწინააღმდეგეს ბურთი თავზე გადაუგდო, თუმცა მიზანს ააცდინა. ამავე ილურიძემ მე-80 წუთზე მეკარესთან პირისპირ გაიყვანა ალექსიძე, მაგრამ გოლკიპერმა ამჯერადაც კარგად ითამაშა, ხოლო დამატებაზე დიასამიძის დარტყმულის კუთხურზე მოგერიება შეძლო. ამ მატჩში აღსანიშნავია ნუკრი რევიშვილის კარგი თამაშიც, რომელმაც რამოდენიმე კარგი სეივი განახორციელა. "დილა" ასეთი შემადგენლობით თამაშობდა: რევიშვილი, ალადაშვილი, კობახიძე (ხიზანეიშვილი 46’), თომაშვილი, გურული, ღონღაძე, ბოლქვაძე (დიასამიძე 60’), გვალია, დოლიძე (ილურიძე 46’), გორელიშვილი, მოდებაძე (ალექსიძე 65’). „დილას“ პრესსამსახური